IMAN YANG KUAT
1 KORINT 10 : 1-13
Hamu angka dongan hinaholongan ni Tuhanta Jesus Kristus! Adong sahalak petinju, ala naung jotjot monang, gabe merasa nunga mampu, gabe so olo be burju latihan. Hape, di ari pertandingan, ternyata godang dope kelemahan na so disadari ibana. Ujungna, talu ma .
ibanaHamu angka dongan! I do nang sipaingot sian turpuk on: Molo dung gabe halak Kristen na denggan ho, boha, ringkot dope ho manjaga dohot melatih diri? I do na masa tu ruas ni huria di Korintus. Molo tajaha ayat 12, tapaudut tu bindu na di jolo ni turpuk on, taida ma, mereka over confidence, merasa aman dengan kepastian keselamatan mereka. Didok rohanasida, nunga tang be haporseaonnami, nunga kuat secara rohani, ala ni i nunga boi be lomonami. Ai nunga tardidi hami tu goar ni Jesus, ala ni i nunga sada hami dohot Kristus; nunga dohot hami marulaon na badia, mangan daging dohot minum mudar ni Jesus, ala ni i nunga Ibana dibagasan hami jala hami dibagasan Ibana; nunga tangkas be hami malua, ala ni i, lomo nami ma mangallang juhut naung pinelehon tu begu (bd. 8). Lomo nasida ma mardosa. I ma rohanasida.
Hamu angka dongan! Memang, mansai ringkot do, jala ingkon adong do di hita kepastian keselamatan. Ise hita na porsea, molo mate ibana saonari pasti masuk ibana tu surgo, tu hangoluan salelenglelengna? Martudu ma jolo!!! Memang, tar maol dope i di torop halak Kristen. Hape i do na ringkot. Ai aha gunana sai burju hita marhuria ianggo so adong di hita kepastian keselamatan, paboa sadarion ho porsea, sadarion do ho malua, jala sahat tu paradeiso?. Itu kepastian keselamatan. Dan itu harus kita miliki.
Na sala ima, molo kepastian keselamatan na songon i gabe kesombongan rohani. Lapatanna, gabe tahilala naung mampu hita di sude hal. Gabe lomonta ma mangulahon dosa, so tajaga be haporseaonta i, so tapasomalsomal (tidak dilatih) be dirinta mangalo dosa, gabe so adong be rasa bersalah, dna.
Ala ni i ma, dipaingot si Paulus ma nasida, asa mulak marsiajar sian sejarah. Tar tudos ma i tu nidok ni Sukarno: JASMERAH (jangan sekali-kali melupakan sejarah). Sejarah adalah tempat kita belajar untuk menghindari yang salah dan mengembangkan yang baik.
Laos sipaingot do i tu hita, asa unang lupa hita di sejarah. Tarlobi di sejarah pambahenan ni Debata di ngolunta sian nahinan sahat tu nuaeng. Angka huria pe, ingkon songon i do; unang ala dungkon ro ruas na imbaru gabe so ringkot di hita angka sejarah, na binahen ni Debata tu hurianta on di tingki na salpu, marhite angka natorasta na parjolo i. Ai molo taboto sejarah, i ma mangonjar rohanta mandok mauliate, alai laos i ma ma parsiajaran di hita mandalani ariari ni ngolunta tu jolo.
Dipatedek si Paulus ma na masa tu bangso Israel, ompunasida i di pardalanan sian Misir tu Kanaan. Dipatuduhon disi, na tutu situtu bangso ni Debata Pargogo na so hatudosan i do nasida. Debata do na mangabing nasida songon anak hasianNa. Didai nasida do ragam ni pasupasu ni Debata: manna, lote, aek sian batu, ombun di arianna dohot tiang api di bodarina. Diboan do nasida manaripari Laut Rara na pinahiang ni Debata. Tung so adong do bangso dia pe na hea mandai na songon i.
Alai, di kehebatan na songon i, adong do kenyataan pahit na so tarholipi. Ternyata, sude nasida na mandai angka tanda halongangan na sian Debata i, angka na tubu di Misir, ndang dipaloas Debata masuk tu tano parjanjian, tano Kanaan i, asing ni si Josua dohot si Kaleb (4 Musa14, 30-32). Ai rage do nasida di halongonan i (ay. 5b). Boasa? Ala "toropan do nasida ndang dihalomohon Debata" (ay. 5a). Boasa? I ma ala mardosa nasida, ala so dijagahon nasida dirina. Ai dihahisaphon nasida do na roa (mereka menginginkan hal-hal yang jahat - ay. 6). Molo tapaihut ma tu bindu 9, 26 – 27, ima ala so adong di nasida penguasaan diri (ndang olo patunduk dirina sandiri).
Nuaeng, dipaingot si Paulus ma huria Korintus, asa unang masa tu nasida na songon i. Na masa tu Israel, gabe tudosan panjoraan (contoh untuk memperingatkan - ayat 6a) ma i. I ma guna ni sejarah, mandok: Jangan mengulangi kesalahan yang sama; jangan terperosok dua kali ke lobang yang sama. Orang seperti itu adalah orang bodoh, karena tidak mau belajar dari kesalahan masa lampau.
Hamu angka dongan! Sian na masa di sejarah i ma naeng paingothonon ni si Paulus tu huria Korintus nang tu hita saonari. Tutu, nunga be dijalo nasida haluaon nabinoan ni Tuhan Jesus i. Alai, parange nasida torop dope songon halak na so manjalo haluaon. Ai madabu dope nasida tu ragam ni dosa. I ma mambahen ndang tangkas didai nasida hinatabo ni haluaon i. Asa, nanaeng patuduon ni si Paulus tu nasida nang tu hita, ima: Ise pe, manang boha pe kehebatanna, boha pe balga ni haporseaonna, tong do ndang bebas ho sian gangguan ni sibolis, sai na ro do sibolis mangela asa madabu tu dosa. Angka naung mandai hinabalga ni pambahenan ni Debata pe, tong do ndang bebas sian elaela ni sibolis. Gariada Tuhanta Jesus pe, Anak ni Debata tong do diunjuni sibolis. Si Job anak haholongan ni Debata ala halak na bonar jala na daulat i pe tong do diunjuni sibolis.
Alai, na gabe persoalan ima: Boha do sikapta molo ro elaela ni sibolis/dosa i? I do na palungunhon roha ni si Paulus, ima sikap nasida na so olo mangalo dosa i, gariada tahe gabe menyerah, paloashon dirina ditaluhon dosa i. Kepastian keselamatan di dalam Kristus tidak dimaksudkan agar kita bebas berbuat dosa, melainkan agar kita bebas melawan dosa.
Tujuan ni si Paulus di turpuk on ima asa diboto Israel, paboa nang pe naung dijalo nasida haluaon i, songon Israel naung pinalua ni Tuhan i, alai nasida pe (nang hita pe saonari),boi do hona uhum ni Debata, molo so tahangoluhon haluaon i (pat. Rom 11, 20 – 22), molo tapaloas dirinta ditaluhon dosa i. Dipaingot si Paulus ma: ingkon jaga, waspada, tangkas mangarajai diri, tangkas melatih diri, songon nidokna di bindu 9, 27 Hupukpuhi do dagingku jala hupatunduk (Tetapi aku melatih tubuhku dan menguasainya seluruhnya). Kita tidak pernah ditakdirkan untuk kalah terhadap iblis; kita telah dimenanghkan oleh kebangkitan Yesus untuk memenangkan setiap godaan dan serangan si iblis. Ingat, bila kita kalah bukan karena iblis yang terlampau kuat, tetapi karena kita sendiri yang memberikan diri kita dikalahkan. Mengapa? Karena di dalam diri kita Tuhan Yesus telah memberi kuasa untuk menaklukkan segala kuasa setan (Mark. 16, 17) dengan mengandalkan kuasa kebangkitan Yesus yang mengalahkan kuasa iblis, maut dan dosa.
Nuaeng, dipajojor si Paulus ma angka dalan masuk ni na boi mamboan hita tu dosa, na ingkon pasidingonta jala taluhononta: 1. Ay. 6- Unang tahahisaphon na roa (menginginkan hal-hal yang jahat) songon binahen ni Israel di 4 Musa 11, 4, na hisapan di juhut, pola digoari inganan i Kibrot-Taawa (tanoman ni hahisapon), ai disi ma ditanom angka na mate ala ni hisapna tu juhut. Diajari on do hita sibolis i asa unang lea rohanta di pasupasu ni Debata naung tajalo, jala sai naeng tahahisaphon angka na asing. Alai tadok ma songon nidok ni si Salomo: sai loas ma panganonku bohal tinurpukkonMi tu ahu (Poda 30, 8). Hawa nafsu yang tak terkendali menjadi jalan iblis menjerumuskan kita. Tumagon ma hita marroha hasabamon, mencukupkan diri dalam segala hal yang Tuhan berikan, dengan mengucap syukur atas segala berkatNya. Unang songon torop jolma nuaeng: ndang sonang rohana di rupa dohot pamatang nanilehon ni Debata tu ibana gabe laho operasi plastik, suntik ini dan suntik itu; ala naeng gumodang artana, manang na impolan di perak, gabe madabu tu hajahaton godang, korupsi, penipuan, dll (1 Tim 6) 2. Unang ma sioloi debata na leban (ay. 7 - jangan menjadi penyembah na mambahen
berhala), songon binahen ni Israel di 2 Musa 32, lombu tuangan mas gabe sisombaon ala so marnamulak si Musa sian dolok i. Sipaingot do i nang tu huria Korintus, unang olo nasida gabe sipelebegu marhite na manganhon sipanganon naung pinelehon tu begu rap dohot angka sipelebegu. Tangkas taingot patik parjolo dohot paduahon i. Tung hagigian ni Debata do molo olo dope hita mardebata sileban. Godang do mansamna: maniop manang manjalo ulaon haholomon (okultisme), marsomba tu sombaon manang sumangot ni ompu, mardebatahon arta, utohutok, parbinotoan, dohot na asing
3. Unang ma hita marmaianan (ay. 8 - percabulan) – songon na masa di 4 Musa 25, 1 – 9, di na torop halak Israel marmainan tu boru ni halak Moab, gabe tartait nasida marsomba tu debata Baal Peor. Mansai tarrimas ma Debata, dipamate ma nasida godangna 24.000 halak (di ay. 8 - 23.000 - ala penggenapan ke atas dan penggenapan ke bawah). Nang halak Korint pe talpe do tu pangalaho i. Ai huta maksiat do huta Korint; di sude kuil ni agama kafir adong do pelacurc suci; di sada kuil adong do 1.000 pelacur suci. Nang halak Kristen pe, boi do madabu parmainanon molo so manat. I do ala torop perselingkuhan, kumpul kebo, na mambahen sursar parsaripeon di zamanta nuaeng. Asa malua hita sian i, ingkon radotanta ma ngolu na marhapantunon jala marhabadiaon.
4. Unang taunjuni Tuhan i (ay. 9 - Janganlah kita mencobai Tuhan), songon binahen ni Israel di 4 Musa 21, 5-6, na mangunjuni Debata manang na boi do lehonon ni Debata sipanganon dohot siinumon na dumenggan di nasida sian naung adong i. Psalmen 78, 18 mandok: Jala sai diunjuni nasida do Debata di bagasan rohanasida laho martung guhon sipanganon guru roharohanasida. Hape nunga diida nasida nian angka nabinahen ni Debata, alai tong diunjuni nasida Debata. I ma ala ketidak-percayaan. Gabe dipamate Debata ma torop sian nasida. Angka na so porsea di hagogoon ni Debata, gabe diunjuni Debata, ingkon hona uhum ni Debata.
5. Unang marungutungut (ay. 10 - janganlah bersungut-sungut), songon nanbinahen ni Israel di 4 Musa 14, 2-4; 16, 1-3+ 41 – 42). Tardok tahe holan na marungutungut do bangso i. I ma sikap na memberontak, jala na so umboto mandok mauliate. Gabe hona uhum ni Debata do nasida. Ganup na sai mangalo Debata, dohot na so umboto mandok mauliate, ingkon uhumon ni Debata do. Molo loja ho mangula ulaon ni Tuhan i hape tong sai ro hata na so tabo begeonmu, manang pahansithu dihilala ho sitaononmi, manang hira na so adil sipata dihilala ho Tuhan i tu ho, didok endenta i: So ho, ungutungutmi paso. Tumagon ma paima tindakan ni Debata, ai angka na dumenggan do pambahenNa tu ho.
Hamu angka dongan! Sude na masa tu Israel i, gabe tudosan panjoraan ma i (ay. 11), gabe typhos, contoh, asa unang madabu hita muse tu dosa na songon i. Ima paingothon hita, asa unang over confidence. Manang ise naung togu maniop haluaon na sian Tuhan Jesus i, hot ma ibana jongjong disi, alai huhut ma waspada, torus melatih diri, torus mangulahon (mempraktekkan) haluaonta i, jamot, unang lengah, ai bisuk do sibolis i, unang madabu hita tu sambilna i (ay. 12).
Alai, taingot ma, molo tung sipata dipaloas Debata hita madabu tu pangunjunan i, ndang pola hal na luar biasa i. Ai olat ni na masa tu jolma dope i. Andul umbalga do naung niae ni Tuhan Jesus. Molo dipaloas Debata pe i masa, pasti ndang paborathu i tu hita, ai nunga diboto Debata ukuran (takaran, dosis) na pas tu hita. Ai Ibana do manompa hita, diboto do olat ni dia kemampuanta. Tar songon na berlatih marsepeda do i: sipata do dipalua, asa taboto manggohet (mendayung) sepeda i; alai diboto do molo naeng madabu, pintor ditiop do. Ingot ma, ndang adong pangunjunan na pabalgahu na boi manaluhon hita. Semuanya itu telah diukur Tuhan. Na manaluhon hita jotjot, ima biarta, holsonta, ketidak-percayaanta, manang keangkuhan, over confidence ta do.
Antong, tiop gomos kepastian keselamatanmi, alai jagahon dirim, unang madabu tu dosa. Ai diuhum Debata do angka pardosa.
Amen.
Pdt Muribo Pasaribu, Pimpinan Jemaat HKBP Ngabang Resort Soparnak Distrik XXVIII Deboskab
No comments:
Post a Comment