KEHENDAK ALLAH DIGENAPI DI DALAM YESUS ( MATIUS 3 : 13 - 17 )

  KEHENDAK ALLAH

DIGENAPI DI DALAM YESUS

( MATIUS 3 : 13 - 17 )

Hamu angka dongan hinaholongan ni Tuhan Jesus Kristus! Seorang bijak selalu melihat "waktu yang tepat" untuk muncul di khalayak ramai sehingga kehadirannya mendapat perhatian dan membawa dampak yang besar. Songon i do didok hata Batak, ingkon paimaon jala luluan do "tingki na lehet", yang pas. Songon i ma Tuhanta Jesus di turpuk on. 30 taon dipaima tingki nabinuhul ni Amana, debata Jahowa laho pasauthon sangkap haluaonNa i. Di na niida ni Jesus naung hehe si Johannes Pandidi, jala mansai torop halak na tertarik, na ro umbege jamitaNa, diida Jesus, on ma tingki na lehet i. Gabe ro ma Jesus tu Aek Jordan. Jala disi ma Jesus dididihon si Johannes pandidi.

 

Memang maol do i antusan dohot patorangon. Alai tauji ma jolo mambuat piga hal na sederhana dohot na ringkot ulahononta sian turpuk on:

1. Na ro do Jesus holan laho pasauthon lomo ni roha ni Debata, AmanNa i. Ai angka sididion holan angka halak pardosa do. Hape Jesus so mardosa. I do ala manjua si Johannes Pandidi, ndang olo mandidihon Jesus: "Ahu do nian patut didionMu, hape Ho ro mandapothon ahu". Alai didok Jesus do: "Songon i ma jolo. Ai tama do tapajongjong nasa hatigoran. ("Biarlah hal itu terjadi, karena demikianlah sepatutnya kita menggenapkan seluruh kehendak Allah." (BIS: "Biar saja untuk saat ini. Sebab dengan demikian kita melakukan semua yang dikehendaki Allah"). Demi ketaatan kepada kehendak Allah Yesus mau melakukan apa saja, termasuk dibaptis oleh Yohannes, bahkan hingga mengorbankan diriNya. Asal ma sau lomo ni roha ni Debata, i do na rumingkot di Jesus.

Ima poda sian turpuk on, asa nang hita olo mengorbankan sude kepentinganta laho patujolohon mangulahon lomo ni roha ni Debata. Molo ditaruhon hepeng nagepok (godang situtu) tu jolom, gabe uang suap asa olo ho papeolhon na sintong, boha, dia do pillitonmu? Molo dijalo ho, mamora ma ho, alai dialo ho lomo ni roha ni Debata. Molo ditulak ho,ndang tamba hepengmu alai diulahon ho lomo ni roha ni Debata.

Ima pergumulanta mida torop dongan Kristen. Di gareja mansai burju do marminggu. Alai, dung sahat di ulaon manang di ngoluna siganup ari, torop dope na sai mangulahon na so lomo ni roha ni Debata. Hape, keseharianta i do ibadah. Parsombaon (ibadah) na sejati ima molo di sude gulmit ni golunta i tapatujolo mangulahon lomo ni roha ni Debata sian angka kepentinganta sandiri. Nuaeng, tamulai ma, tapasomalsomal ma. Ida jala hilala ma, pasti adong ma hamubaon dohot las ni roha nang ketenangan na imbaru di ngolum dohot di masyarakat.

2. Na mangihut ma: molo olo Jesus padidihon diriNa, ima patuduhon na olo do Jesus pasobok diriNa tu jolma. Asa gabe dos situtu dohot hita jolma. Saratus persen gabe jolma. Ndada satonga jolma satonga Debata, manang ndang holan "songon" (berlagak) jolma. Alai gabe jolma situtu jala ala ni i ndang dihailahon Ibana, manggoar nasida (hita jolma) angka anggiNa (Heb 2:11), alai ndang mardosa (Heb 4, 15) ai ndang tubu sian boni ni jolma Ibana (pat. 1 Joh 3:9).

Boasa ingkon gabe jolma? Asa boi Jesus paluahon jolma. Ai holan marhite na gabe jolma do, boi lehonon ni Jesus hosaNa, songon hosa ni jolma na so targade i, lehononNa laho manobus hosa ni jolma naung targade tu sibolis i. Di Golgata ma i dilehon. Disi ma dibayar lunas sude utang ni dosanta. Ima mambahen singkop hasesaan ni dosa di hita, jala sahali do i ro di salelenglelengna.

Laos pandidionNa i ma palumbahon paboa na mate ma Ibana alai laos hehe muse. Asa, pandidion ni Jesus on ma papatarhon (Epiphanias) misi (siulaon)-Na di portibi on, ima manghophop hita, paluahon sian hamatean, jala manaluhon hamatean (pat. Mat. 20:22), sahat tu na parade hangoluan sisalelenglelengNa. Ise naung tardidi tu bagasan goar ni Tuhan Jesus, naung mate do ibana jala naung hehe rap dohot Jesus (Rom 6:3-5).

3. Na mangihut ma. Di ayat 16-17 didok, dung tardidi Jesus, pintor hehe ma Ibana sian aek i, jala mungkap ma langit, jadi tarida ma mijur Tondi ni Debata songon darapati sumonggopi Ibana, laos mangkuling ma soara sian ginjang, mandok: On do Anakku, Haholongan i; halomoan ni rohangku do Ibana!

a. Molo didok, mungkap ma langit-langit terbuka, ima patuduhon naung diungkap Debata sude rahasia ni Debata na di banuaginjang tu Tuhanta Jesus. Holan Ibana do jolma naung hea sian banuaginjang, ala Anak ni Debata parbanuaginjang i do Ibana. Dibagasan Jesus, ndang adong be pembatas ni banuaginjang dohot Jesus. Laos i do patuduhon, paboa dibagasan Jesus nunga mungkap do dalan tu banuaginjang (BE. 90:3). Jala holan Ibana do na boi dalan mamboan jolma tu banuaginjang. Ndang adong na asing (Joh. 4:16). Asa, manang ise hita na giot naeng tu banuaginjang, unang mabiar, unang bingung. Nunga adong dalan. Holan sada do dalan i. Ima Jesus. Haporseai ma Ibana pasti boanonNa do ho tu surgo. Jala, tapaboaboa ma tu anakkon dohot dongan, asa sude nasida olo dohot tu surgo holan marhite Tuhanta Jesus!

b. Dung i didok muse: "tarida ma mijur Tondi ni Debata songon darapati sumonggopi Ibana. Laos mangkuling ma soara sian ginjang, didok ma: On do Anakku, Haholongan i; halomoan ni rohangku do Ibana! Nunga disurirangkon Debata hian tu si Johannes: la tusi diida ho tuat Tondi i jala mian di Ibana, Ibana do sididihon Tondi Parbadia (Joh 1:33b). Ibana ma Mesias ni Debata.

c. Alai, di hasomalan ni Israel, on ma upacara pengurapan (pamiahion) gabe raja (pat. 1 Sam 6:13), gabe Sintua ni Malim (pat. 3 Musa 8:12), dohot gabe panurirang (pat. 1 Raj 19:16). Pamiahion i marlapatan naung dipasonggop Debata TondiNa tu nasida asa margogo mangula tohononna. Ima na sahat tu Jesus. I ma patuduhon, na dipabangkit Debata do Ibana gabe Raja, Sintua ni Malim dohot panurirang. Ndang miak dibahen Debata mamiahi Ibana, alai Tondi ni Debata sandiri do. Molo dilantik sasahalak gabe raja, diendehon ma ende di Psalmen 2:7 "Anakku do Ho, sadarion do Ho hutubuhon" dohot ayat 17, “On do Anakku, Haholongan i; halomoan ni rohangku do Ibana!". Asa, molo tarbege nuaeng soara i, i ma uduhon paboa Raja na sinuru ni Debata do Jesus i, nasinuru ni Debata laho mangarajai hita bangsoNa, alai ndada be Israel na leleng i, Israel na imbaru, angka na porsea, naung tinobus ni Kristus nama.

d. Na mangihut, tarida ma Darapati. Ima simbol ni ngolu na imbaru. Ai darapati do dipaharuar si Noah dung sun aek na sumar. Diboan do pusuk ni hau, na patuduhon naung ro ngolu na imbaru dung sidung uhum rimas ni Debata. Ima nahinarohon ni Tuhan Jesus. Dibagasan Ibana, nunga marujung be rimas ni Debata, alai nunga ro ngolu na imbaru. Ala ni Tuhan Jesus, ndada hamatena be jambarta, alai hangoluan na manongtong nama.

e. Marhite dilehon Debata kepastian tu sude Israel nang hita, asa unang adong be na ragu-ragu manjangkon Jesus i: ia Jesus i tutu situtu do Mesias dohot Raja nibagabagahon ni Debata sian nahinan. Jesus i do Mesias pinaima ni Israel dohot sandok portibion na laho paluahon jolma sian dosa.

Hamu angka dongan! Sian hatorangan i, ra nunga lam patar be di hita, ise do Jesus i. Manang ise angka na so apala tangkas hian dope porsea di Jesus, ra nunga mamungka lomo rohanta mida Ibana, ate!. Nunga patar be songon indahan di palastik ise Jesus i, ate!. Boha, adong dope alasan di hita so manghaporseai Ibana? Nuaeng ma tingkina, di hapapatarNa on, jangkon, haporseai jala haposi ma Ibana gabe Sipalua di ho. Pasti, sonang ma roham.

4. Alai, adong dope sitiruon dilehon Jesus marhite sude na masa i. Dia ma i? Ima haserepon ni roha na luar biasa. Tung dao do nian di toruNa si Johannes Pandidi. Si Johannes pe diparhotopot do i, ai didok ibana do: na hurang tama do ahu mangkarhari tali ni sipatuna (Joh 1:27). Alai olo do Jesus dididihon si Johannes. Haserepon na luar biasa, bukan? Halak na tumimbo olo unduk tu na tumoru sian ibana.

Haserepon ni roha (Kerendahan hati), i do sifat dohot karakter na menonjol sian Ibana. Tumangkas tajaha di Pilipi 2 : 5 - 11 (Tajaha ma). Alai ala ni hasereponNa i do "dipatimbo Debata Ibana jala dibasabasahon tu Ibana Goar na sumurung asa nasa goar, asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano". Wahh.. hebatna i ate! Haserepon marparbuehon hamuliaon na sumalin. Ala ni i ndang pola be ganjang dohonon. Holan on ma: Ise na naeng sangap, dipaserep ma rohana. Lam serep rohanta, lam tamba hamuliaonta.

Antong, tapeop ma nuaeng: "Nunga tung sapatarpatarna dipapatar Jesus diriNa tu hita, na jolma situtu do Ibana alai huhut Debata situtu. Ibana do Raja, Sintua ni Malim, nang Panurirang sinuru ni Debata. Ibana ma na mate, laho manghophop hita sian hamatean, alai na hehe manaluhon hamatean. Ibana do naung mangungkap dalanta laho mulak muse tu Debata Ama di banuaginjang.

Boha, adong dope sian hita na raguragu laho manjangkon Jesus gabe SipaluaNa. Saonari ma, jalo ma Ibana gabe Sipalua di ho. Amen. 

Terjemahan Bahasa Indonesia:

Tunggu ...

 

Pdt Muribo Pasaribu Pendeta Fungsional HKBP Setia Mekar Resort Setia Mekar Distrik XIX Bekasi