Psalm 100:1

Olophon ma Jahowa, ale sandok tano on!

Sahat ma tabe sian hami tu hamu sude. Horas ma di hita. Sada jou-jou do turpuk on. Jou-jou tu sandok portibi on. Tu sandok bangso asa pasangap Debata. Ditompa Debata tanoon dohot nasa isi na, lumobi jolma, asa pasangap Ibana. Nuaeng sahat ma hata on tu hita di huria on, ala tongon hita nuaeng marjubieum, manghalashon parsahata i Barita na uli tu luat on. Patuduhon las ni roha do jou-jou on. Gabe didok: olophon hamu ma Jahoba.

Adong 3 namambahen marlasniroha di turpuk on:

Parjolo: Ala Debata do na manompa nasa na adong, na manjadihon nasa na adong.

Paduahon: Ala Debata do namamillit hita gabe bangso na.

Patoluhon: Ala Debata do mangaramoti, marmudu-mudu hita.

I do na tahalashon

I do na tahamauliatehon

I do na taolophon

Tuhan itu baik!

I do umbahen dijouhon: olophon hamu ma Jahowa. olophon hamu ma Jahowa:

1. Ala Ibana do manompa na sa na adong.

2. Ala Ibana do mamillit hita gabe bangsona

3. Ala Ibana do mangaramoti dohot marmudu-mudu hita.

Hamu angka dongan

Ndang adong na so diparade Debata dingolu ni nasa na marhosa. Tung saluhut do diparade Ibana, songon dalanna marmudu-mudu nasa namarhosa, ndada holan di hita jolma alai dohot do diparade, na ringkot tu ngolumi nasa namanggulmit nasa na marhosa. Taida pohon-pohonan, angka dorbia, angka pinahan, boi do mangolu denggan. Di hita jolma pe, diparade do na sa na ringkot di tano on.

Dilehon do tano na napu, na manubuhon angka suan-suanan gabe boi mangan angka natinompa na i. Dilehon do las ni ari nang udan ditingkina be, asa boi marguna tu ngolu ni natinompa na i.

Nunga rade di tano on angka naringkot di jolma. Alai jolma i do ingkon mangula, jolma i do ingkon mamangke tingki, jolma i do ingkon padenggan ngolu na.

Raja Salomo mandok:

Namangula tano na, bosur ma ibana mangan, alai halak na sora mangula na marlange-lange, bosur ma ibana di hapogoson. Na ringgas mangula, i do na dapotna mangan.

Adong do hatani natua-tua mandok: tumagon do na hundul-hundul sian na modom-modom. Tumagon na mardalan-dalan sian na hundul. Alai tumagon do na mangula sian na mardalan-dalan. Alani i ma, sasintong na, ingkon adong do tekad sian jubileum on: ingkon adong janji iman sian jubileum on. Ingkon adong perobatan dung jubileum on.

Ingkon lam dumenggan na ngolu, parsaoran, parhuriaon, panghobasion.

Ingkon lam dumenggan ma nang generasi na mangihut sian hita sinuaeng.

Hamu angka dongan

Debata do na mamillit hita gabe bangso Na. Dalanna mamillit hita i ma marhite na manogos Nommensen tu tano Batak:

- Gareja

- Singkola

- Rumah Sakit

- Padenggan Parngoluon ekonomi

Ulaon ni huria do pature ngolu. Ingkon marhadomuon do pangkobasion ni huria tu ngolu siganupari. Ingkon dohot do huria mangatasi dohot mangalusi persoalan ni jolma. Pangkobasion ni huria ndada holan di bagasan gareja, alai dohot do tu portibi on tu na humaliang.

Dipillit Debata hita gabe bangso na asa boi hita gabe pasu-pasu tu na humaliang hita. Ingkon mandok mauliate portibion, ala jongjong hita songon sada huria di sada-sada inganan. I ma molo gabe mamboan angka na uli hita tu na humaliang hita.

Hamu angka dongan

I ma na tahalashon nuaeng, pambahenan ni Debata dingolunta. Marmudu-mudu dohot mangaramoti hita.

Alai ulaonta nuaeng naummarga i ma: membangun kehidupan yang lebih baik. Generasi muda na dumenggan, angka ianakhonta i asa dumenggan singkolana, asa dumenggan ngoluna, asa dumenggan parangena, dohot haporseaon na.

Membangun manusia di mulai dari kepala.

Ingkon pistar do nasida, ingkon sehat, ingkon denggan do gizi nasida. Alani i, ingkon mangula do hita, ingkon tapangke do tingki. Sijolo-jolo tubu mandok:

Na pinahan è Napu

Gabe naniula è mangan

Debata na mamasumasu

Amin.