PUJI MA DEBATA
( PSALM 148 : 11 - 14 )
Hamu angka dongan hinaholongan dibagasan goar
ni Tuhan Jesus! Pasti sude do hita marlas ni roha borngin on. I do ala -
sian pengamatanniba sai andul tumorop do na ro tu gareja di borngin
ujung ni taon songon on. Nauli ma i, molo di ujung ni taon on taronjar
rohanta ro tu bagasjoro on. Tontu parjolo laho mandok mauliate tu
Debata. Unang ma songon na asing an, ro holan laho mambege sadia ma
hepeng ni huria manang laho mangalului angka hasalaan disi. Tung himpu
ma rohanta maniru parsalmen on, na tung tangkas sian nasa roha dohot
tondina mamuji dohot mandok mauliate tu Debata.
Hamu angka
dongan! Lima pasal parpudi ni buku psalmen on ma hira puncak ni sude
buku psalmen. Molo tauji tabayangkon nanidok ni turpuk on, jala tapaihut
muse tu Psalm 150, wah .. luar biasa! Dihehei jala dihara parpsalmen i
do sandok portibi on asa masiboan alat musikna be laho mamuji Debata ...
asa rap marende. Sude na adong di ginjang ima: surusuruan dohot
paranganna, mataniari, bulan, langit, aek na di langit dohot na di laut;
dohot sude na di tano on ima: binatang laut, ular naga, samudera raya,
api, hujan es, salju, kabut, habahaba, dolok, robean, sude hau, binatang
liar, gulomit, dohot pidong na habang. Jala di turpuk on dijou asa nang
sude angka raja, bangso, pembesar, pamarenta, sude dolidoli, na
marbaju, natuatua sahat tu naposo, sude dijou, dihara, dipahehe asa rap
marende mamuji Debata. Luar biasa!!
I do nidok ni si Calvin, ama
ni huria i: "Dunia ini ibarat suatu Theatron Gloriae Dei", atau "sebuah
panggung untuk kemuliaan Tuhan". Nasa na tinompa ingkon mamuji Debata,
songon alusna tu pambahenan ni Debata.
Alai jotjot ndang
tabege jala ndang tasadari be ende ni na tinompa i. Hape molo hehe hita
manogotna i, pintor marende do angka pidong, manuk nang sese paboahon
naung ro ari na imbaru. Angka binatang di robean pe pintor marlas ni
roha do. Molo tabege soara ni ombak ni laut, gabe sada ende na uli do i,
na masiaduaaduan, jala jotjot do i gabe inspirasi di angka komponis na
tarbarita laho menggubah ende na uli. Disi ro mataniari pintor
mangerbang do angka bunga paruarhon angurna. Molo tapahohom dirinta di
toru ni hau na potpot na godang di hutan, begeonta do soarana songon na
marende, marhusip, berdesir, semilir diombus alogo. Molo ro borngin,
molo tapahohom dirinta, begeonta do soara ni angka binatang hutan,
kelelawar, nang angka gulomit pe songon ende na uli. Taida do nang
hinauli ni bulan dohot angka bintang di langitan i. Sudena i, gabe ende
ni angka natinompa i, na gabe pamujionna tu Sitompa ibana. Molo sai
tapamanat angka i, tutu situtu ma hilalaonta, ia portibi on ima Panggung
Kemuliaan Tuhan. Alai, ala kesibukan ni jolma, ala godang ni angka
soara na tabege, isara ni soara ni halak na asing, soaranta sandiri,
soara ni ekonomi, karejo, adat, ianakkon, sipanganon, parabiton, dohot
lan soara na asing dope, jotjot gabe so tabege be soara pamujion ni
angka natinompa i. Hita pe, gabe so tahilala be hinauli ni pamujion
nasida i.
Hamu angka dongan! Sian dia do haruar ende pujiupujian?
Ima sian roha mauliate. Sian dia do ro roha mauliate? Ima sian
panghalonganghonon, dari sebuah kekaguman. Sian dia do ro kekaguman? Ima
sian roha na olo mamilangmilangi nabinahen ni Debata. Ima na masa jala
pinatupa ni si parpsalmen on:
1. Parjolo, marende do ibana mamuji
Debata, ala dihatindanghon jala dihalonganghon ibana, paboa sandok
portibion, termasuk ahu dohot na adong di ahu, tung na tinompa ni Debata
do i, ai Ibana do mandokkon gabe tartompa ma saluhut (ayat 5b). Molo
tauji mangarimangi natinompa ni Debata, pasti longang, pasti
terkagum-kagum do hita. Molo tabereng parhusoran ni mataniari di arianna,
bulan di bodarina, haroro ni udan di tingkina, adong musim panas, musim
dingin, na patubuhon suansuanan gabe adong kehidupan.
Diatur
Debata do saluhutna i gabe berkesinambungan. Ekosistem na denggan
nabinahen ni Debata, i do menjamin kelangsungan hidup ni sude na mangolu
(ayat 6). Ditompa Debata do suansuanan, na mangalehon hosa tu jolma.
Dilehon suansuanan dohot pinahan, na boi panganon ni jolma. Ditompa do
jolma na manjagahon asa mangolu angka na tinompa. Adong logo ni ari,
adong muse ari parudan na mambahen tubu angka boni jala marparbue angka
suansuanan. Dipaojak do angka na tinompa i di ingananna be, asa taratur.
Marhusor do portibi (bumi) secara konstan mambahen adong ari, minggu,
bulan dohot taon. Sude planet dipahundul di ingananna be, huhut marhusor
mangihuthon natinontuhon ni Debata gabe ndang masiantuhan (ayat 6b).
Molo
tapamanat tahe pamatangta sandiri. Pamatangta on terdiri dari
berjuta-juta sel, urat syaraf, otot dohot organ na marmansammansam, alai
ditata, diatur Tuhanta do i sedemikian rupa gabe pamatang na mambahen
hita boi mangolu dohot denggan jala hipas. Molo dipasorang Debata angka
dakdanak tu portibi on marhite angka keluarga, dung hirahira sia bulan
ditonun Debata posoposo i di bortian ni inangna, itu sebuah keajaiban,
bukan? Ala n i, naeng nian ganup hita sai mangendehon endenta i: “O
Debata, tung longang do rohangku, molo hubereng natinompaMi". Saluhut
bintang, hilap dohot ronggur, manghatindanghon hasangaponmi". Molo dung
songon i antong, ingkon lam gogo ma endehononta: "Marende au, Tuhan
mamuji Ho. O Debata, sangap do Ho” (BE. 569)
2. Paduahon, marende
do ibana mamuji Jahowa, ai sasada goarNa i do na timbul, diatasi
hamuliaonNa i do tano on dohot angka langit (ayat 13). Ndang adong
debata na asing na songon Ibana. Mamunjung do Debatanta i. Tung so adong
do na boi patudoson tu Ibana (2 Musa 15, 11)
I do ala pola didok
tu ganup jolma, asa unang adong na mambahen marangkup Debatanta. Molo
olo hita marsomba tu angka debata dohot tu hagogoon na asing, ndang
taakui be na mamunjung do Debatanta i di hamuliaonNa. Ala ni i, haotoon
do molo sai adong dope na olo porsea tu hagooon na asing tarlobi molo
olo dope porsea tu ulaon haholomon, tu datu pangulpuk, ajimat, sumangot,
dlna.
3. Alai na rumingkot dope, marende do ibana mamuji Debata
ala dipatimbul Debata do sada tanduk di bangsoNa (ayat 14). Tung
dipapulik Debata do bangsoNa i gabe bangso na gogo, na bolon jala na
disegani angka bangso na asing (tajaha di Rom 9, 4). Ndang olat ni i,
dibagasan Jesus Kristus AnakNa i, diparade Debata do tanduk haluaon tu
sandok na porsea (pat.Luk. 1,69). I do natahalashon di Pesta Natal. Ai
dibagasan Jesus ma dipajongjong Debata tanduk, na gabe haluaon ni
saluhut angka na porsea. Holan dibagasan Jesus do dapot hita haluaon na
singkop. Ala ni i, nang angka surusuruan dohot parangan parbanuaginjang i
pe tung denggan jala uli do marende di hatutubu ni Jesus i. I do nang
niendehon ni si Simeon dohot si Hanna di turpuk Epistel (Luk. 2, 22- 40)
nangkin: nunga tangkas be diida nasida naung adong haluaon na singkop
jala na mamunjung holan di bagasan Tuhan Jesus Kristus. Songon i ma hita
angka na porsea, ingkon torus mangendehon haluaon na pinatupa ni Jesus
i.
Hamu angka dongan! Niulakhon ma muse mandok naung nidok
nangkin: Sian dia do haruar ende pujiupujian? Ima sian roha mauliate.
Sian dia do ro roha mauliate? Ima sian panghalonganghonon, dari sebuah
kekaguman. Sian dia do ro kekaguman? Ima sian roha na olo
mamilangmilangi nabinahen ni Debata.
Ima sipatupaonta nian di
borngin parpudi ni taon on. Dison do hita mamilangmilangi sude nabinahen
ni Debata. Mungkin do ra nian, godang taadopi di taon on angka na
hansit, marsahit, kegagalan, persoalan, tilahaon, mabalu, hasurbuan,
rugi di usaha, anakkon na manusai, dlna, dlna. Alai, songon halak na
porsea, unang ma lalap hita mangetong na hansit dohot na laho manang na
berkurang i. Andul dumenggan do molo taetong sude na tajalo dohot angka
na tading dope di hita sahat tu nuaeng. Molo songon i do tabahen
maretong, pasti kita akan terkagum-kagum oleh perbuatan Allah dalam
hidup kita selama setahun ini.
Hubahen ma sada cerita illustrasi:
Ro ma sahalak ama tu jabu ni panditana. Mansai mandele, jala didok
ibana, bulus nama ibana mate, naeng maningkot, ala bangkrut
perusahaanna. Alai didok pandita i ma: Amang, tauji ma jolo maretong.
Dibuat pandita i ma sada papan tulis. Dibahen garis mambola dua. Di
sabola hambirang disurathon: YANG HILANG. Jala di sabola siamun: YANG
TERSISA. Disungkun ma: Aha do na mago? Didok amanta i: Perusahaan nunga
bangkrut, dan akan disita. Disurathon pandita i di Yang Hilang:
Perusahaan bangkrut. Alai disungkun ma muse: Adong dope isterim? Manang
naung mate do? Manang naung berselingkuh? Pintor hatop dialusi amanta i:
Ah, ndang panditanami. Isteriku do sada parompuan na paling
manghaholongi au, uli, burju, satia. Ndang adong isteri na songon i
burjuna", ninna. Ohhh.., ninna pandita i, huhut disurathon di kolom Yang
Tersisa: Isteri yang cantik, penuh kasih dan setia. Disungkun: Boha,
naung modom di kolong jembatan do hamu nuaeng? "Pintor dialusi amanta i:
Ndang, adong dope jabunami; ai holan perusahaan i do disita, ianggo
jabu na balga jala nauli i, i dope huingani hami". Disurathon pandita i
di kolom Yang Tersisa. Songon i ma torus disungkun pandita i. Gabe
tarida: Holan sada do di kolom Yang Hilang alai ianggo di kolom Yang
Tersisa marribu nari dope.
Songon i ma tabahen mamilangi ngolunta
on. Unang hita lalap manangisi na mago/ na laho ii. Tahamauliatehon ma
na tinggal i dope, na andul gumodang sian na mago/ na laho i. Tabilangi
ma i borngin on. Ra pasti, ndang habilangan hita i. Molo songon i, pasti
kita akan kagum. Songon nidok ni KJ. 439 i: Berkat Tuhan mari
hitunglah, kau kan kagum oleh kasihNya. Sian kekaguman i ma tangkas
hamauliateon dohot pujipujianta pasahatonta tu adopan ni Debatanta di
borngin on. Jala laos i ma mangalehon kepastian di hita, paboa di taon
na ro pe, songon i do patupaon ni Debata tu hita. Ima mambahen olo ma
hita mardalan mandalani taon na ro dengan langkah yang mantap di bagasan
kepastian bahwa kita punya Allah Pencipta segala sesuatu, yang pasti
mau dan mampu memelihara kita. Kita punya Allah yang yang sudah
memberikan tanduk keselamatan di dalam Tuhan Yesus bagi kita. Dohononta
ma: "Marende au Tuhan mamuji Ho, o Debata, sangap do Ho".
Amen.
No comments:
Post a Comment